طريقة عمل سلطة الفواكه - بالصور

-->

 المقادير :

الفواكه اللي تحبينها { فراوله , تفاح , رمان , برتقال }

عصير برتقال وليمون ,

الطريقه : 

أعصري الليمون والبرتقال قبل اي شي عشان على طول نحط فيهم الفواكه 

حتى ما تسود ,,

,, قطعي الفواكه صغار صغار 

اخلطيهم بالعصير .. الليمون ماراح يكون له طعم فقط عشان يحافظ عالفواكه من التأكسد

احب السلطة تكن بارده عشان هالشكل اسويها قبلها بفتره وابردها بالثلاجه

والف صحه وهنا ~

-->

طريقة عمل الفريتاتا - بالصور

-->

Asparagus, Red Pepper & Potato Frittata

الفريتاتا هي شي يشبه عجة البيض , الا انها تنطبخ وتتقدم مثل الكيك

وبما أن احنا نبي وجبتنا تكون صحيه فأنا استبدلت صفار البيض بالبياض فقط

لأن كل الدهون فالبيضه تكون في صفارها 

وطبعا ما حطيت اي ملح للوصفه , مثل ما انتوا عارفين الملح يحبس السوائل فالجسم 

المقادير :

1- حبات بيض "بياض البيض "ما يقارب 3\4 كوب معياري "

2- 2م ك زيت دوار الشمس

3- الجبن الأساس " ricotta cheese" ما كان متوفر فاستخدمت عكاوي 1\2 كوب 

4- نص حبة بطاطه مهروسة

5- نص حبة بصل

6- 3 حبات مشروم طبعا لازم يكون طازج

7- 1\4 فلفل رومي البرتقالي

8- م ص فلفل اسود

ملاحظة : جبنة العكاوي من الاجبان المنصوح فيها للدايت وتخفيظ الوزن 

لانها ما تحتوي على ربوهيدرات كثيره ونسبة الدسم فيها قليله ,,

وممكن تستبدل بحلوم او قشقوان ,,~

الطريقه

فوري البطاط قبل كل شي

حركي بياض البيض بالخفيف وضيفي الجبن معاها في صحن صغير وحركه بالخفيف وثم ضعيه جانبا

تقطيع كل الخضروات واسخن الزيت بدرجه حرارة متوسطه في مقلاة غير لاصقه وثم أضيف كل من البصل وأحركه قليلا حتى يشقر لونه

وبعدين الفلفل الرومي حتى يذبل

وبعد ذلك البطاط المهروس طبعا بنكون هارسينه من قبل ونضيفه

ونضع المشروم في المقلاة ويتم التحريك لمده 5 دقائق تقريبا

وبعدين ضعه الخلط جانبا حتى تبرد وانتبهوا تحطونه وهو حار حتى لا يتكتل البيض وأول ما يبرد حطي خلطه البطاط وخلطيه بالخفيف حتى لا يتفتفت الجبن 

وبعدين امسحي المقلاة بقليل من الزيت وضيفي خلطه البيض وغطي واتركيه لمده 12 دقيقه أو حتى يتم التأكد من أن البيض استوي من فوق

وهذا هو الشكل النهائي

-->

طريقة عمل دجاج محشي ومشوي مع الشعير - بالصور

-->

بقسم الوصفه قسمين قسم لطبخ الشعير وقسم لطبخ صدر الدجاج المشوي ..

مقادير الشعير :

نص كوب شعير

مرق دجاج

كوبين ماي

شوي جزر مقطع مكعبات

شوي فلفل رومي اخظر

فلفل رومي احمر

بصلة صغيرة مفرومه

حبة ثوم مهروسه

بصل اخظر طويل

زيت زيتون

اوريغانو +روزماري

ربع كوب عصير ليمون

الشعير

الخضروات تنغسل >> حلفي 

وتتقطع صغار صغار انا احبهم بالهشكل ما احب احس فيهم وانا اكل ..

هذا الروز ماري والاوريغانو

ما اعرف ليش كاتبين للبيتزا   ؟؟ تخلف بصراحه

هذا الزيت زيتون اكسترا فيرجن .. استخدمه بالمرش يسهل عملية الطبخ غير انه تتحكمين بالكمية اكثر

وعصيير الليمون ..( انصحكم بهالعصاره تجنن)

الحين بينا عالجد ..

اول شي ينغسل الشعير لين يصفى الماي ..

بعدها نظيف مرق الدجاج والماي ونخليهم عالنار لين يغلي ..

لما يغلي نظيف الشعير ونوطي النار ونخليه يستوي لمدة ساعه الا ربع

في صحن ستانلس ستيل نرش الزيت زيتون ونضيف البصل ونحركه لين يذبل

بعدها نظيف الثوم ونحرك لين تطلع ريحته

نظيف الجزر

وبعدا نظيف الفلفل الرومي

ونحرك لين ما نتاكد ان كل الخظروات استوت ..

(لا احد يستغرب اني اظيف كل شي لحاله انا من طبعي احب اعطي كل مكون حقه وبااالي طويل عالطبخات ما احب اعفس كل شي على بعظه احس النكهات تروح )

الحين نظيف البهارات ..

وفي الاخير نظيف البصل الاخظر وتحريكه عالسريع بس

خلصنا الحمسه .. ناخذ منها مقدار ملعقه كبيره ونخليه عالجنب بنستخدمه مع الدجاج بعدين ..

ونظيف الشعير ونخليه لين ياخذ النكهات عدل ..

وفي الاخير نظيف عصير الليمون وهذا شكله في الاخير 

,,

الحين خلصنا من الشعير نيجي للدجاجه ..

المقادير :

صدر دجاجه

لبن

فلفل اسود

فلفل احمر حلو

مقدار ملعقه من الحشوة

شرايح من كل من باذنجان + فلفل رومي + بصل احمر)

شوي مرق دجاج

زيت زيتون للتحمير ..

بالبداية استخدمت انصاف صدور دجاج من ساديا اذا عندج طازج احسن من المثلج

نخلي الثلج يذوب بعدها ننظفه من اي شحم زايد او دم ونشرخه من فوق بالسكين 4 شرخات بس مو وايد عميقه

ونقصه من عالجنب بحيث صدر الدجاجه يبين كانه جيب او مخبى او بوكيت اللي تبونه

في صحن قزاز نحط اللبن

والبهارات ..

وعصير الليمون

ونحركهم مع بعض ..

ونظيف صدر الدجاج وانقعيهم على قد ما تبين ليله كامله ساعه ساعتين اللي هو ..

نبتدي نجهز الخضرة 

نشوحهم على مقلاه مرشوشه بزيت زيتون

نصفهم في صينية الفرن

بنفس المقلاه نشوح الدجاجه بس ليمن تاخذ لون ذهبي على بني

ونحشيها بالحمسه ونصكر عليها باعواد الاسنان

نظيف فوقها شوي مرق دجاج ونصكره بالقصدير ونخليه لين يستوي

وبكذا تكون خلصت الطبخه بس انا احب اقدم مع الدجاج طماط مجفف وهذي هي طريقته

ترصين طماط شرايح وتمسحين صينيه بزيت وتصفين الطماط وترشين فوقه شووي ملح يساعد على ان الطماط يتخلص من كل الماي

طبعا انا ما انتبهت ان فتحت الملح واسعه فانصب الملح صب

ندخله الفرن على اقل حرارة ونخليه لمدة 4 ساعات او اكثر

طبعا هاي تكونين مجهزته من قبل وتحطينه في قزازه اير تايت

بس انا استعجلت عليه وطلعته قبل لا يجف امية بالمية

,,

وهذي الصور النهائية ..

وفي النهاية ان شاء الله الطبخه تعجبكم ..

-->

طريقة عمل تشيز كيك الجالكسي - بالصور

-->

المقادير 

الطبقه الاولى 

كيكة الشوكولاته الجاهزه (بيتي كروكر)

الطبقه الثانيه 

2 ضرف دريم ويب 

علبة فيلادلفيا او 12 حبة كيري 

نص علبة حليب نستله 

علبة قشطه 

الطبقه الثالثه 

3 حبات جالكسي 

علبة قشطه.... بحمام مائي 

نخلط الكيك زي الطريقه المكتوبه بالضبط 

وهنا راح نحتاج ثلث الكميه او بالكثير نصها ....نبي الطبقه تكون خفيفه 

الباقي سوي فيه كب كيك 

صورت خلط الكيك ....ترا مو عشان اوريكم خلاطي  

وندخله الفرن لحد ما يستوي 

على بال ما يبرد 

نخلط الطبقه الثانيه 

نحط كل المقادير

بعد ما نخلط ....نحطها على طبقة الكيك ....ودايركت على الثلاجه 

لحد ما تجمد 

والافضل اذا بتسوينها....تكون قبل بيوم عشان تتماسك مضبووووط 

....لما تجمد الطبقه الثانيه 

نسوي الجالكسي بحمام مائي مع القشطه 

والله مصورتها ...

مدري وين راحت الصوره 

(اكيد حمتو مسحها من كثر ما يلعب بالكام )

ونصبها على الوجه ...ونجملها بجالكسي مبشور 

وهذا شكلها النهائي 

زوووم من فوق ....

وهذي القطعتين 

وصحتين على قلبكم  

-->