طريقة عمل الخبز الاوزبكي - بالصور

-->

يسعد اوقاتكم ربي بكل خير 

شخباركم حبيباتي ان شاء الله طيبين 

الرياض هالايام اجواء ولا اروع من كذا يارب تديم علينا نعمك اللي لا تعد ولا تحصى

وترزقنا بالمطر اللي مافيه كدر 

في البدايه حابه اشكر حبيبتي مشاعل على الخلفيه والهيدر وحفظ الحقوق من موضوعها [ هُنا ]

صراحه موضوع مميز فيه كل اللي تبغين يعني مافيه عذر انك ما تسوين موضوع 

عاد انا حرفت فيها شوي لكن شغلها احلى فديتها 

اللي يتابع مواضيعي يلاحظ اني احب الخبز والخبيز 

وعايلتي يعشقون خبز البيت اي نوع اي شكل اهم شيئ خبز حار مقرمش 

من ايدين امهم ان شاء الله مع جبنه او لبنه ولو حتى حاف مع كاسة شاهي 

عشان كذا تلاقوني افتش وادور عن وصفات جديده او غريبه للخبز ومن اماكن بعيده 

الله يخلي النت وصلنا لكل مكان وعرفنا على حضارات كثيره واحنا ببيتنا 

اليوم خُبزنا من اوزبكستان 

اللي جذبني في هذا الخبز هو فنهم في تشكيله 

يعني ما قالوا خبز نخبزه وياكلونه والسلام 

لاااااااا

فيه عرب يقولون هذا تميس اوزبكستان 

لكن فيه فرق بين شغلهم وشغل التماسيين حقيينا 

هم يتفننون في نقش الخبزه وتشكيلها بطريقة تميزها عن غيرها من الدول 

اول ما شفته كنت احسبه لوحات من الخشب محفوره 

لونه روعه والنقش والحجم مرتب ويجذبك بدقته 

وكل منطقه لها نقشه خاصه فيها 

هذه صور من النت اعجبتني 

ما يتقارن خبزهم باللي سويته لكن كانت تجربه ممتعه 

عاد اختكم اريام دورت على طريقة هالخبز ولقيتها لكن كان فيه مشكله او حاجه نقصتني 

وهي القوالب اللي ينقشون فيها الخبز ما لقيت اي شيء قريب منها 

وهذا شكلها 

قمت مشيت حالي باللي طلع معي ذاك الوقت 

ندخل الحين على طريقة صنع هالخبز تراه سهل مررره 

المقادير :

2 كاس دقيق فوم 

1 ملعقة صغيره سكر 

1ملعقة صغيره خميره فوريه 

رشة ملح 

2 ملعقة صغيره زيت 

كاس الا ربع ماء دافئ 

نبدأ يا حلوين نحط المقادير كلها مع بعض 

نضيف الماء الدافئ بالتدريج ونعجن ونطول واحنا نعجن السر بنجاح الخبز واي عجينه مشابه 

هو العجن فترة طويله وراح تحسون ان العجينة قاسيه شوي وناشفه 

استمري اعجني وبتنعم معك لكن بتظل قاسيه 

نشوف عجينتنا صارت ناعمه 

ندهن الاناء اللي بنخمرها فيه بشوي زيت ونتركها تخمر الى ان يتضاعف حجمها تقريبا ساعه 

او اكثر شوي في هالوقت لان الجو برد 

بعد كذا ناخذ العجينه ونقسمها 2 او نتركها بحجمها اذا نبغاها خبزه كبيره 

ندهنا بالزيت من دون ما نعيد عجنها ونتركها 10 دقائق 

بعد كذا نبدأ نضغط من الوسط محاولين نفرد الوسط ونخلي الاطراف مدببه 

  

بعد ما انتهينا من الفرد نجي على اطراف الخبز ونضغط بطرف الاصبع عشان نثبت الشكل 

الحين ننقلها على صينية الخبز 

هنا اختكم ما لقت الا الشوكه عشان تقلد الاوزبك 

واطلقو العنان لايديكم والشوكه وسووا اللي يخطر على بالكم 

يا عيني يا عيني وش رايكم بس لي جذور اوزبكيه هههههههه

نجي الحين لتشكيل الاطراف [ يوم خلصت حسيته عمود فقري لسمكه]

بطرف الاصبع الابهام والسبابه نحاول نضغط على طرف العجين بكل اليدين 

يعني كانك تقبصين او تقرصين العجين 

داير ما يدور على الخبزه 

وتررررااااا هذه الخبزه الاوزعربيه 

نتركها تخمر مدة 10 الى 15 دقيقه 

ندهنها بصفار البيض المخلوط مع الحليب ونرش السمسم والحبه السوداء 

وندخلها فرن ساخن ونتركها لمن تستوي 

وهذه خبزتنا توها طالعه من الفرن 

وهنا بعد ما قطعتها تجيك الاطراف مقرمشه والداخل هش 

وهالنوع من الخبز ينفع مع الايدامات والفول والعدس 

واي وصفه فيها مرق 

عاد وانا ابحث بالمواقع الاجنبيه لقيت وحده مثلي ما لقت القوالب 

قامت تضغط العجين بقاعدة اي فنجال او كوب يكون فيه زخرفه 

وقلدتها ببيالة الشاهي 

وهذا شكل الخبزه بعد ما شكلتها 

وهنا بعد ما طلعت من الفرن وكانت مقرمشه شوي فردتها مره 

بالنهايه اتمنى اللي قدمته اضاف لكم شيء وانكم حبيتوا خبزاتي 

-->