-->
الموضوع راح يكون ع ثلاثة أقسام
الجزء الأول كيف نختار القهوة
الجزء الثاني طريقة حمس القهوة
الجزء الثالث طريقة عمل القهوة
كيف نختار القهوة ؟!!!
أكيد كلنا نعرف إن القهوة أنواع كثييييره
برية[ خولانية ] - هرريه - برازيلية وكثييير أنواع
طبعاً الأفضل عندنا يالسعوديين هي البرية
طبعاً أنا ماعمري اشتريت قهوة ولاأميزها من بعض << ليه مسويه موضوع أجل
أمي دايماً تشتريها
لكن سألت أمي كيف أميز البرية درجه أولى عن غيرها
قالت إن البرية ريحتها حلوة بينما اللي غيرها تحسين فيها ريحه ماهي حلوة
تقدرين تقولين زنخة بس ع خفيف
والبرية فيها قشور خفيفة
كيفية حمس القهوة ؟!!!
وهذي أهم نقطه بالموضوع إذا ماضبطتيها ماراح تكون القهوة زينه
لكن قبل نحمسها لازم ننظفها
أول شيء ننقي القهوة من الحصى والقهوة اللي يكون لونها أسود أو أي شوائب
تكون فيها
أنا هنا الكمية اللي معي كيلو ونص لأن وزنة القهوة 3 كيلو
هذي الأشياء اللي طلعتها من القهوة
وهنا بعد مانقيتها ..ننسفها عشان نتخلص من القشور الخفيفة اللي مانقدر ننقيها
وبعدها نغسل القهوة
طبعاً حنا ماكنا نغسلها بس الفترة الأخيرة صرنا نغسلها
نصحتنا بغسلها جارتنا
هذي شكلها أول ماصبيت عليها الموية
وشوفوا كمية الغبار والحبوب الخفيفة اللي تطفو عليها
صبي الموية والحبوب اللي طفت معها بعد
وصبي عليها موية جديده
تقريبا بعد المرة الرابعة بتصفي الموية
وشوفوا ع اليمين كيف صارت الموية
وبعدها أصب عليها موية مغلية واحركها وأصفي القهوة
ولاتخافين ماراح يخفف طعمها [ بعض الناس يقولون يمكن تسمج وتصير مالها طعم وأنا أقول لا عن تجربه ]
وبعدها أصفي القهوة بالمصفاة وأتركها تسرب مويتها
الخطوة اللي بعدها افرشي بصحن كبيير فوطه كبيرة
وحطي فيها القهوة ولاتكون متراكمة فوق بعض ساوي سطحها
وع طول ع الشمس
وأضمن لك نص يوم بأجوائنا الرهيبة وتنشف
كل هذا مابعد جينا لحمسة القهوة
إذا نشفت
بتحتاجين قدر كبير ومستكه من النوع الأصلي واشنه
تأخذين القهوة وتضعينها بالقدر ع النار وتمسكين القدر بكفوف لأجل ماتتأثر يدينك
وتضعينها ع النار شوي وترفعينها عنه وتنسفين
وترجعينها ع النار مره ثانية وتتركينها شوي << ش رأيكم بالشرح بس
وتنسفين مره ثانية وترجعينها ع النار
وتعيدين هالحركة[ يعني تتركينها ع النار نفس المده وترجعين تنسفين ] إلين مايتغير لونها للذهبي <<صبغة شعر مو قهوة
الهدف من النسف إنه يخفف الحرارة ع القهوة فتنضج وهي مااحترقت
لكن لو طولت ع النار بتحترق وهي مانضجت << صبه رده
إذا وصلتي لهاللون حطي عليها ملعقتين ونصف مستكه وأشنه
وانسفيها ع النار مره وحده
وبعدين ارفعيها
وحطيها بصحن كبير واتركيها تبرد
طبعاً نصيحة اطحنيها بمطحنة لأنهم يطحنونها ناااعم
لكن إذا طحنتيها بالبيت تكون كبيره لذلك إذا سويتيها بتحتاجين كمية اكبر
كيفية عمل القهوة؟!!!
ألحين نجي لطريقة عمل القهوة بحيث نضبطها ماتصير خفيفة ولا ثقيله
بنحتاج
ست أكواب ماء + فنجان قهوة كبير مليان قهوة [ أو ملعقتين كبار ملياانه قهوة ]
أحب أسوي قهوة بقدر
وهنا أول ماحطيت القهوة
وتتركينها تغلي حتى تستوي
وتصير بهالشكل
طبعاً لو كانت حمسة القهوة ماهي مضبوطه
يصير لونها إما أخضر << إذا كانت مانضجت أثناء الحمس
أو بني<< إذا كانت محترقة حتى لو كان حراق خفيف
أنا أضيف لها الزعفران [ إيراني أصلي ] وهي تطبخ حتى تأخذ كلها نفس اللون
لكن لو حطيته بالدله أول ماتصبينه يكون لون وبعدها يغمق اللون
والحين نحط بالدله ملعقتين كبيره مليانه هيل وشوي قرنفل أقل من ربع الملعقة
ونصب القهوة
وبعدين استمتعي بالقهوة اللي تقعد دوخة الرأس
يازين ريحتها
-->
سلام. شكرا على الشرح المفصل صراحه اول مره اشوف هذي الطريقه للتحميص ،يعني تنظيف الحبوب بالماي وازاله الاوساخ صراحه روعه وحتى طريقه تحميص القهوه انا كنت افكر دايما انه لازم نحرق الحبوب ، وبعدين لون القهوه ما كانه اصفر زياده عن الطبيعي ؟يعني هذا عادي ولا لا! وبعد اريد اسأل سؤال هذي الطريقه من وين يعني من السعوديه ولا من عمان ولا اليمن ولا... ياريت تفيديني اكثر واذا كنتي تعرفي طرق اكثر لتحميص القهوه يا ريت ترسليلي الطرق ..يعني مثل الطرق السعوديه للتحميص او اليمنيه او العمانيه او الاماراتيه والكويتيه ..هذا ايميلي وشكرا على المعلومات ..وفي انتظارباقي الطرق وشكرا ksasr107@gmail.com
ReplyDeleteجميل جدا
ReplyDelete