طريقة عمل كرات الدونات - بالصور

-->

Donut Balls

السلام عليكم ورحمة الله وبركاته

شخبار الحلوين ؟؟

إن شاء الله بخير ..

وحشتــوني ... 

الطبق اللي راح انزله اليوم

حلو و سهل و سريع و لذيذ أكيد 

الله يسلكم من فترة شريت مكينة الكيك بوبس ..

المكينة شريتها من lakeland بستي سنتر-الدوحة 

ما اتذكر السعر

وفي منها ماركة ثانية في موقع أجنبي اسمه babycakesshop

هاي شكل المكينة

وعلى طول نفس اليوم جربناها أنا وموني في بيت أمي .. أخذنا كيك مكس عادي بيتي كروكر تشوكليت .. وسويناه .. ما تاخذ وقت طويل عشان تستوي .. 4 دقايق للدفعه الوحدة .. طلع الشكل حلو ومدور.. غمسنا الكيك في تشوكليت وعقب رشينا فوق التشوكليت جوز الهند محمص .. طلع توووحفه 

المهم حبيت أجرب المكينة مرة ثانيه على كيك ليمون .. بس ما ضبط وياي 

وأعتقد لأني طولت في خلط الكيك .. يعني اللي بتجرب المكينه على كيك مكس لا تخلط الكيك وايد وتمشي على نفس ما هو مكتوب على العلبة ..

المهم

قعدت أدور في النت على طرق ثانية .. لين ما حصلت وحدة أجنبية مجربة دونت

حبيت الطريقة وقلت يالله نجرب

طلعت تجنن .. لاهي كيك ولا هي دونت

يعني بين الاثنين

وفوقها تغطية سكر sugar glaze

نبتدي بسم الله ..

المقادير

المكونات الجافة

كوب وثلث طحين جميع الاستعمالات 

1\3 كوب سكر

1 م ك بيكنغ باودر 

1\2 م ص ملح 

( تخلطينهم مع بعض )

..

المكونات السائلة

1\2 كوب حليب المراعي ( اللي متوفر عندج )

1\4 كوب زيت

1\4 كوب قشطة رايبة sour cream

بيضة 

1 م ص فانيليا 

( تخلطينهم مع بعض )

" ملاحظة انا هني مدبلة المقادير"

الطريقة

بعد ما تخلطين المواد الجافة بروحها والمواد السايلة بروحها .. تجمعينهم مع بعض

وتروحين تسوين التغطية

مقادير التغطية ( تقريبية ) تقدرين تتحكمين فيها ( المهم ما تكون وايد سايله ولا وايد جامده )

1\8 كوب حليب ( تقريباً ملعقتين كبار )

1 م ك زبدة 

1 م ص فانيليا سايلة

3 اكواب سكر مطحون

تسخنين الحليب والزبده والفانيليا

تحطينهم على السكر وتخلطينه

بعدين تجهزين المكان اللي راح تشتغلين فيه

وراح تحتاجين ..

زيت عشان تدهنين المكينة

فرشاه سيليكون .. عشان تستحمل الحرارة

مغرفة ايسكريم صغيرة أو ملعقة صغيرة عشان تحطين العجينة

شوكة عشان ترفعين الدونت من تغطية السكر

وشبك عشان تحطين عليه الدونت بعد ما تغطينه في السكر

وحطي لج سفرة تحت الشبك عشان ما يتوسخ المكان اللي تشتغلين فيه

هاي ال working area مالتي .. لوول 

تشغلين المكينه وتخلينها تحر .. بعدين تدهنين الحفر فوق وتحت وتوزعين الخليط 

المكينة أوتوماتيك هي تضبط حرارتها .. لا تخافين انه يحترق

إذا حابة تسوينه مع تشوكليت تشيبس يطلع أحلى وأحلى

هذا النوع اللي استخدمته أحلى من النوع العادي .. شريته من hershey's دبي

يذوب بسرعه .. وطعمه نفس kisses الكبار شوي

وهني مع التشوكليب تشيبس

تسكرين المكينه وتحسبين أربع دقايق بالضبط

ويطلع شكلهم هيييك 

طلعي الحبات من المكينه .. وصبي الدفعه الثانيه

وبعدين حطي الدونت في السكر .. تكون بردت شوي

صفي الدونت على الشبك وخليهم يبردون وطبقة السكر تنشف

وبس

هاي موضوعنا خلص ... ما في أسهل من جذي

وقدميهم للحلوين

صورة كمان

-->